DOSIER TEMA 6: AS PROGRAMACIÓNS DIDÁCTICAS VIXENTES

Ola de novo! Hoxe vou falar do tema 6, As programacións didácticas vixentes, e especialmente da parte práctica do mesmo, na que tamén puidemos traballar en grupo.

Neste novo tema afondamos nos aspectos máis importantes das programacións didácticas das linguas estranxeiras para a ESO, o Bacharelato, a FP e as Ensinanzas de linguas de réxime especial. En liñas xerais, podemos dicir que esta temática resultou moito máis lixeira e concreta que o tema anterior que, como mencionei noutra publicación, incluía contidos máis densos de carácter lexislativo.

Como futuros docentes de linguas, imos ter que afrontar a elaboración ou co-elaboración da programación didáctica da nosa materia antes ou despois. Dende esta perspectiva, ten sentido achegarnos neste mestrado ás programacións didácticas a nivel teórico pero, sobre todo, e fundamentalmente, a nivel práctico. Por sorte, na programación do tema 6 incluíuse unha actividade que para min foi unha das máis útiles a nivel pragmático das que fixemos ata o momento.

Esta actividade consistiu na análise en grupo dunha programación didáctica real segundo a rúbrica de avaliación empregada no concurso de oposición en Galicia. O noso grupo escolleu por unanimidade a programación didáctica de inglés para 4º da ESO do IES Santa Irene de Vigo para o curso académico 2019-2020. Decidimos traballar sobre esta porque buscabamos unha unidade didáctica que cumprise o máximo posible os estándares esixidos para tal documento e, logo dunha rápida busca, esta programación do IES Santa Irene semellaba a máis profesional e con maior calidade nos contidos, na estrutura e na redacción. O obxectivo final para o noso grupo era atopar e debullar unha programación de certa calidade que nos puidese servir de referencia para o futuro. E así foi. Malia a que despois de analizar en profundidade a programación decatámonos de que había algúns apartados incompletos, o documento gardaba efectivamente a relación de contidos que cabe esperar dunha programación. Ademais, a programación analizada acadaría unha cualificación satisfactoria segundo os criterios de avaliación da rúbrica da oposición. Velaquí o noso traballo de análise e avaliación da programación.

Como xa avancei anteriormente nesta publicación, este exercicio de análise en grupo foi sen dúbida a práctica que máis me achegou á realidade da docencia das linguas estranxeiras e a que máis me axudou a esbozar un bosquexo mental non só da programación dunha materia, senón dun suposto de oposicións. En resumo, considero esta actividade moi completa e enriquecedora para a aprendizaxe activa do alumnado e, en consecuencia, espero que se manteña na programación do tema 6 para as vindeiras promocións do mestrado.